حبيت أنقل لكم تجربتي مع مواد التشطيب للفائدة ورداً على سؤال الأخوان اللي يبغون يشطبون من الصين.
اولاً نبدأ بأسم الله وأقول ان فيه ناس تكتب في المنتديات ومنهم ناس كتبوا في هذا الموضوع بالذات يجيبون لك الأحباط ويهبطون عزيمة الناس والحماس اللي عندهم وهذولا الناس لا عندهم خبرة في الموضوع ولا تجربة ولكن نقلاً عن فلان عن زميله عن ولد عمه. وهم بطريقتهم اوبكلامهم هذا يحرمون الناس من فرص متوفرة بأسعار مناسبة لمجرد تناقل كلام ماهو صحيح او على الأقل مش دقيق. اللي ابغى اوصل له ان كثير من الكلام اللي نشوفه في المنتديات مش دقيق وكون واحد راح الصين وماكانت تجربة ناجحة فمش معناه ان الفكرة مش مجديه وليش مايكون هو اللي سبب الفشل لنفسه كونه ما أخذ المقاسات الصح او ماكان إختيارة صحيح او لم يتعامل مع مكتب جيد.
راح أعرض الموضوع من الناحية الإيجابية لأنه بصراحه السلبيات قليلة او معدومه اذا كان الترتيب جيد والخطوات محسوبة. انا طبعاً أستفدت كثير جداً من كتابات الأخوان وتجاربهم في منتديات مختلفه, كتبت العناوين وسألت أصحاب التجارب وأخذت المقاسات بدقه وأخذت معي مخطط البيت مسجل عليه كل التفاصيل.
التنسيق كان مع مكتب في الرياض بحكم سابق معرفة من قبل زميلي اللي سافر ثلاث مرات للصين عن طريقهم وأحب اقول ان تجربة كانت ناجحه حتى انه عندما أستلم الأثاث في الدمام وحسب كلامه لي شخصياً قاال: حصلت مشترياتي كاملة ولم تتأثر بالشحن حتى انه ما انكسر الأ كوب واحد مع ان خط سير البضاعة كان الصين-سنغافورا-جبل علي-البحرين-الدمام. تخيلوا ان ما أنكسر عنده الأ كوب واحد مع ان فيه لمبات وإنارة وتحف وإكسسوارات. هذا دليل على ان أكثر الكلام اللي نشوفه ماله أساس.
بالنسبه للمحلات هناك كثيرة وكثيرة جداً بحيث انك ممكن تمشي شهر تلف على المحلات وماتلحق تشوف كل البضاعه ويكفي انك تقول ان الصين هي سوق العالم. ولكن اذا كان الشخص مرتب ويعرف اللي يبغاه, ماراح يكون عنده مشكلة ابدا, والموضوع سهل جداُ. أغلب المحلات بضاعتهم متشابهه تقريباً ويبقى الإختلاف في طريقة عرضها أو إقناعك بأسلوب او خدمه معينه او كونك رايح على عنوان معين بحكم تجربة سابقة لشخص عجبه تعاملهم او بضاعتهم.
الجودة: كل درجات الجودة متوفرة, الرديء الرخيص موجود والجيد المناسب موجود والملكي الغالي موجود (ولكل شراياً بضاعة وسوقي). يبقى انت وأختيارك وميزانيتك.
انا بصراحه ماحددت ميزانية معينه لأني مارحت أبحث عن التوفير بقدر ماكنت أبحث عن الجودة ووفرة الأختيارات. والحمدلله حصلت اللي كنت أبحث عنه وبأسعار مناسبة مقارنة باللي موجود في أسواقنا. مثال : بعد مارجعت حصلت بورسلان أسباني مشابه للي انا أشتريته من الصين في اللون والخامه وكان سعرة أكثر بحوالي 40%.
أشتريت الأرضيات والديكور ومسلتزمات الحمامات جميعها وكذلك الإنارة (سبوت لايت فقط) بحكم ان فيليبس مش موجودة عندنا هنا.
بالنسبه للمتاعب والمشاكل تكاد تكون معدومه اذا أستثنينا تعب السفر ومشكلة البحث واللف والدوران في المحلات حتى تلاقي اللي يرضيك. مشكلة الضغط النفسي كونك رايح لمهمه ولازم تنجزها وماتبغى تحس انك فشلت هذي تضغط عليك انك تستعجل في شراء حاجات اما غاليه وتكلف نفسك كثير او انك تشتري حاجات جودتها قليلة وتندم وهذا سببه الضغط النفسي ولكن اذا الشخص عنده ألوان محددة ومقاسات دقيقه (طبعاً لازم يزودعليها 10% أحتياطاً للقص والتكسير), أظمن له بينجز مهمته في وقت مناسب وباقل مجهود.
تعامل الصينين أقدر أقول عليه جيد اذا كانوا محتاجينك في شيء يعني اذا مثلا يبغونك تدخل عندهم المحل او اذا كنت عندهم في المحل يبغون يقنعونك تشتري. ولن بشكل عام هم محترمين بحيث أنهم مايضايكونك ولا حتى بالنظر وكل واحد منهم في حاله (عكس مانلاقيه في الدول العربيه السياحية من التحرش بالكلام والحسد حتى على ملابسك وماتسلم حتى من تعليقاتهم والتشكيك في نواياك او حتى أخلاقك مع انهم اول مرة يشوفوك).
تبقى مشكلة الأكل هي الحاضرة في كل الكتابات وتختلف من شخص لآخر كون البعض مايحب المطاعم او يحب نوع معين ولكن كل شيء متوفر اما بالنسبة لي ماعجبني مستوى المطاعم اللي هناك من يمنية ولا شامية وكنت انا وزميلي أخذنا مستلزمات الفطور وكذلك عدة ومسلتزمات الطبخ من رز وبهارات وغيرها. الهدايا والمشتريات بصراحه تحتار ويبغى لك تحجز نصف الكونتينير للهدايا والمشتريات (مبالغة لاحد يصدق). أقصد انه فيه حاجات غريبة ومميزة تلفت إنتباهك ويتولد عندك رغبة غريبة في الشراء من كثر الحاجات اللي تعجبك.
أغراضي وصلت الميناء أمس ولي عودة للموضوع لما توصل البيت. وأي سؤال انا حاضر